Latgolys symtgadis kongresa eiszinis - 8 dīnys da kongresam

Latgolys symtgadis kongresam tik tod ir jāga, ka latgalīšu volūda pasaruoda školuos i jaunīši tū suoc pīzeit par sovu.

Nui, kongresa nūrise ir vārsta iz nuokūtni, dūmojūt par tū, cik paaudzis vēļ lamtys latgalīšu volūdai. I frazei – lītojit tik sātā i vyss nūtiks, tehnologeju godu symtā nav eisti pamata, partū ka mes zinim, cik dreizai aizīt volūdys, ka tuos nav jaunajuos tehnologejuos i školā. I, prūtama līta, tū pījimt piec tik gara laika puotraukuma nav vīglai. Ārtuok i vīgluok par tū nadūmuot, bet bez saknem tok nadzeivoj.

Partū vairuoki pasuocīni ir dūmuoti taišni jaunajim. Vysmozuokajim gruomota “Gostūs pi Boņuka”, kū 2. majā prezentēs Rēzeknē i jau pyrma tuo vess pa 41 Latgolys školu, leluokim bārnim jau pusgodu pīejamuo datorspēle “Īsapazeisim”, bet vydsškolānim i studentim – Latgalīšu volūdys nakts. Nuocit poši i jemit vacuokus leidza!

AFIŠA

Eipaša prīca, ka storp kongresa delegatim byus ari školāni, jūs nav daudz, bet tys līcynoj, ka ir ari tehnologeju godu symtā taidi, kas napuorstuoj vaicuot. I na tikai “guglei”, bet sev, školuotuojim, viesturei.

Gona daudz atsasauce ari školu direktori, tok vysod gribīs vaira. Ir cereiba, ka ari jī pastuosteis par nūtikšonom Rēzeknē i suoks īvīst kongresa idejis sovuos školuos.

Jaunū izdavumu I.Šuplinska, L.Rundāne, A.Andrejeva “Gostūs pi Boņuka” piec kongresa var vaicuot Rēzeknis Tehnologeju akademejā školom tys tiks duovynuots.