Latgalīšu volūdys svātki
28.04.2017.Kasgods apreļa beiguos, pīmynūt drukys aizlīguma atceļšonys gadadīnu, Rēzeknē nūteik skotuvis runys konkurss „Vuolyudzāni” i latgalīšu volūdys, literaturys i kulturviesturis olimpiade. Itūgod olimpiade nūtyka 17. reizi i beja veļteita Latgolys kongresa symtgadei.
Olimpiadis nūtikšonys vīta namaineigi ir Rēzeknis 1. Vaļsts gimnazeja, kas viesturiski ir saisteita ar školu pyrmsuokumim Latgolā. Kab pīsadaleit skotuvis runys konkursā, školuos nūteik konkursi, bet olimpiadis daleibnīkim nūpītnai juosagatavoj uorpus stuņžu, partū ka reti kurā školā ir nūvodvuiceibys voi latgalīšu literaturys, kulturviesturis pulceņš.
Tok olimpiadis rezultati paruodēja, ka tī, kur latgalīšu volūdys lītuojuma tradiceja školuos ir sistematyska, kur latgalīšu fakultativi ci pulceni pastuov spieceigu, Latgolā pazeistamu personeibu vadeiti, tī ari bārnu zynuošonys i attīksme pret latgaliskū ir nūpītna. Kai soka, vītys var atsaškiert, bet namaineigi olimpiadis augšgolā ir Baļtinovys vydsškola (itūgod 1. vīta), kū iniciej direktors Imants Slišāns, daudzim vaira pazeistams kai teatra „Palādas” aktīrs i Ontana lūmys atveiduotuojs, i Nautrānu vydsškola (3. vīta), kurys komandu vysu itū laiku gatavoj Latgalīšu volūdys, literaturys i kulturviesturis asociacejis nūdybynuojuma vaļdis prīšksādātuoja Veronika Dundure.
Eipaša prīca par komandom, kas itamā godā daguojušys kluot: Drycānu (školuotuoja Silveja Laizāne, komanda tyka 2. vītā) i Rekovys (školuotuoja Anita Koniševa). Tilžānīši olimpiadē pīsadola regulari, pasateicūt školuotuojis Ainys Rakstenis vadeibai, bet kruoslovīši jau vairuokus godus brauc pat ar divejom komandom (školuotuoja Inga Skerškāne).
Kai īrosts, olimpiadē beja pīcys kuortys, i gryušuokuo izaruodeja frazeologejis kuorta. Partū vaicuojumi par Latgolys kongresu vydsškolānim eipašys gryuteibys nasaguoduoja, bet kulturys tests deve vīlu puordūmom, cik daudz i kurā Latgolys pusē ir aktivuokī kulturys nūtykumi.
Paraleli olimpiadei Latgolā pazeistami cylvāki viertieja skotuvis runys konkursa „Vuolyudzāni” runuotuojus. Itūgod bārnus īdvasmuoja i jūs uzastuošonā klausejuos: Saeimys deputats Jurs Viļums, muzykants Guntis Rasims, aktīrs Kristaps Rasims, uzjiemiejs i muzykants Jurs Vucāns, Rēzeknis Tautys teatra režisore Māra Zaļaiskalns, dzejneica Anna Rancāne, školuotuoja Ineta Urtāne. Konkursā pīsadaleja 63 školāni nu 27 Latgolys školom trejuos vacuma grupuos: 1.–4. klase, 5.–8. klase, 9.–11. klase. Vysus daleibnīkus prīceja grupys „Bez PVN” uzastuošona, bet konkursnīki īsadvasmuoja nu fakta, ka sovlaik konkursā pīsadalejuši ari bruoli Rasimi. Jūs sasnīgumi i styngrais patriotisms ir kai paraugs daudzim jaunīšim Latgolā.
Pasuokumu organizēja Latgalīšu volūdys, literaturys i kulturviesturis školuotuoj asociaceja, finansiali atbaļsteja Rēzeknis nūvoda pošvaļdeiba, Latgolys Studentu centrs, žurnals „A12”, duovynojūt žurnalus vysim daleibnīkim, Latgolys Producentu grupa duovynuoja disku „Celīs, bruoļ!”, Rēzeknis Tehnologeju akademeja uzvarātuojim pasnīdze kora „Sonitums” disku i folklorys ekspediceju diskus školuotuojim, Latgalīšu kulturys bīdreiba – školuotuojim duovynuoja S. Ūdris i J. Ryučāna romanu „Aizlauztais spaits”, syltu uzjimšonu nūdrūšynuoja Rēzeknis Vaļsts 1. gimnazeja, par aizdavumim olimpiadei guoduoja profesore Lideja Leikuma, profesore Ilga Šuplinska i raksteneica Sandra Ūdre.
Materialu apkūpuoja Veronika Dundure i Ilga Šuplinska